給自己時間去療傷

今日係第3天。

星期一既打擊很大。雖然面對失敗我好有 "經驗"，suppose相同既打擊面對多左，應該有免疫能力，或者唔再覺得甘痛。但今次，真的很痛。希望愈大，失望真的愈大。上兩個星期的"感覺"，係以往失敗時所沒有既。於是更增加我對今次放雪胎既信心。自從得而復失後，我更迫切地希望成功。曾經擁有過，個種感覺好真實，我真真正正曾經有過一個小生命係我肚入面，二人為一體甘呼吸，生活。個刻既感覺，呢一生都無法忘記。

大半年的等待。係，呢Ｄ野永遠唔到人控制；但對於我來講，的確係折磨，呢段日子好漫長，好似月月等運到。諗過搵工，又怕難請假，有壓力。有時諗，睇醫生做手術洗既錢都差唔多等於份人工，不如專心做好呢件事先，始終時間唔等人，而我又必須承認性格上易緊張易有壓力。係呢件事上面，我唔能夠做任何有風險既事，希望能將機會率升到最高。

上個月，抱著期待，興奮既心情將兩個寶貝雪胎帶返屋企，同自己講：有得放胎即係有機會，要當正得左甘同佢地生活。自當日起，我既生活唔再係１個，而係３個。雖然知道唔係話放左胎就一定得，失敗左甘多次，呢個道理我好明。但做得放胎，放左入去，點都要當正得左，甘先對得起自己，對得起 bbs。過去兩個禮拜，心情好輕鬆，雖然有時都會 1516，但整體上都算平靜，因為覺得內心有一樣好重要好重要既野 ---希望。每日既生活都好有規律，定時食飯，定時休息。食花膠，飲奶，靜雞雞同肚裡 bbs傾計，鼓勵佢地。在日日在家既情況下，當然有上網 check 下 bingo 既徵狀，其實呢Ｄ內容睇左好多次，但都係忍唔住再睇。好多徵狀都有，仲要同上次 bingo 既感覺一樣。就係甘，令我更肯定今次得左，期望更高。

以往失敗過好多次都有買驗孕棒驗，結果好憤慨傷心絕望甘掉左好多支孕棒驗。之後我唔再自己驗，寧願等抽血報告；結果無驗個一次，成功左。所以今次就算幾想知都無自己先驗。星期一面對董醫生宣佈既結果，真係唔識反應，個刻什至希望自己係發緊夢。

星期一做負里子，拉直把頭髮。頭髮天生 "luen"，好難打理。一直唔敢做，忍忍忍。今天豁出去。做完返到屋企，忍左成朝既情緒終於可以大爆發，大哭一場，傷痛，失望，憤恨，乜情緒都有。質問主:"點解???"

星期二朝係難捱既一日。以為星期一喊完會振作，原來未得。之前甘有規律甘生活，好大原因係因為 bbs。而家無啦，打回原型，好似無左一個努力，好好生活既目標。一日三餐拖到過曬鐘先食，無胃口。不停甘執屋，執衫，洗野，麻醉自己，令自己好忙好忙。但個心，依然好痛。

同自己講 :"Ok，任性埋今日，盡情發洩埋今日，聽日要振作。下個月中又要再黎過，要準備個狀態同心情。" 但呢種難受，呢種個心梗住，我真係唔知做咩可以令自己好返，無事，再振作。

過去一個月10.30pm 就訓既習慣，變左 12點幾都未準備訓；就算訓係度，依然難以入睡。

星期三 (今天)，復原中。
呢兩日谷 M 個肚真係好辛苦。平時 M come 好少話肚痛，係腰痛。今次甘谷甘辛苦應該係因為之前做既藥。
本來 plan 左好多野俾自己做，叫自己走出呢個陰霾。做左幾件事，但心情依然好 down。唔敢唔想同身邊朋友傾，因為個個都輕而易舉甘做左阿媽，並且成日問我幾時生。曾經同過有一兩個好 close 既frds傾過，佢地生左，會關心我，會安慰我，但唔會明白。我更唔想接受既係 --- 別人既同情。
今日係度諗，５月放胎，有信心嗎？如果無信心，係咪仲去做？！唉，但轉念一諗，有無信心都好，結果都唔到我控制。有時最怕既係，連希望都無埋。一路撐住自己走落去，堅持落去既就係"希望"呢兩個字。如果無左希望，就真係乜都無，連生存落去既意義都無。
3 日啦，已經 3 日啦，頹夠啦。好想鬧醒自己: "難過自己，慘過自己，面對既困難挑戰多過自己既人多的是!! 但人地都無放棄，都繼續作戰下去，都係度努力緊。
怨夠啦，down 夠啦。醒下啦!!!"

打呢篇野，好大程度係俾自己發洩。打完上面個段，決定打自己兩巴!! (當然唔會好大力）好啦，夠啦，去沖涼，洗去一切霉氣。

明天又係新既一天。目標，終有一天會實現。

2014 第一次放雪胎

2013 對我來講係好難過既一年。年頭要迫自己接受千辛萬苦先得來既 BB 要離開我地，我以為自己喊左幾個月應該心情平覆左，原來唔係，個心原來一直都隱隱作痛。係心理同生理狀態都唔好既情況下，見左好多個月董醫生，都有不同既理由未能放胎，其中最經常既原因係內膜唔夠厚。

針對呢個原因，我狂飲全脂奶，又食花膠，結果消化不良，仲衰，亦攪到個人心情更差。舊年自己好似精神分裂甘，有時好 down 好沮喪，有時又鼓勵自己唔好灰心，努力做運動，食 & 做對生Ｂ有幫助既野。結果一直連放雪胎既機會都無，心情真係跌到落谷底。

踏入 2014 年，我同自己講唔可以再係甘落去，甘既狀態就算有得放雪胎，成功既機會都好低。於是幫自己 set d 小目標，例如學下興趣班，做運動，去會所報 aerobic，務求令自己既生活充實 D，多D活力，唔係一味等運到，亦唔想成個生活淨係 focus 係生 b 呢件事上面。

另外，今年董醫生建議我做個內窺鏡檢查，睇下子宮有無黏連，結果子宮無問題，但抽左Ｄ組織去驗就發現荷爾蒙有問題。董醫生開左荷爾蒙藥俾我食，並同我講唔再等啦，今次內膜有 8-9mm 都照放。結果上月底放左２粒雪胎，一粒 grade 1，一粒grade 2，放胎當日內膜有 11mm。

上兩個禮拜自放胎後，除左返醫院打針，我足不出戶。今次心情唔算好緊張，始終放過甘多次胎。加上有上次成功既經驗，所以我抱有好大期望。記得係大約 Day 5 or 6 感覺到個肚有吉吉地，個胸又一路有脹，我一廂情願地認定今次實得啦，老公亦好開心，諗住今次一定掂。但到尋晚開始，突然覺得個肚有強烈谷 M feel，我心寒一寒，但見網上好多人講 bingo 既感覺同 M come 好似，所以安慰自己無事。

點知今朝返去見董醫生，個驗血報告係少過３，FAILED。個刻我真係呆左，唔識反應，什至有Ｄ錯覺，覺得自己係咪發夢 jar?! 董醫生話內膜厚度無問題，但唔中既原因有可能係血液循環既問題，雖然佢有開 aspirn 俾我。由滿懷希望，到面對失望，我個刻喊唔出，唔識後應。我不停係度諗，係邊度出左問題，係邊度我做得唔夠好?!!

老公今朝特登請假陪我，點知要帶住呢個甘沉重既心情返工，佢送我返屋企既途中大家都好沉默，把口同個心一樣甘重。

董醫生建議我今個月食一個 cycle 荷爾蒙藥整靚個子宮內膜，５月再放雪胎。最靚個批已經用完，下次放的話會放2 個 grade 2，一個靚Ｄ一個差Ｄ。

晏就食完飯我第一時間去做負里子，由舊年已經想做，但一路諗住放胎怕影響到所以抑壓住唔做。覺得改變下個樣，心理上好似好 D...頭先係 salon 洗頭個時，當Ｄ水流過我塊面，我差Ｄ想喊...今朝一路忍住既情緒，返到屋企終於大爆發，我忍唔住大喊一場。一邊喊一邊禱告，我好想問主幾時先肯俾個機會我做媽媽...我真係等左同努力左好多年啦...有時真係唔知點樣撐落去...