再次挑戰耐性

之前試過多次想係度寫野，但攪極都寫唔到，所以放棄左。

搬左來呢度好唔慣，唔知大家點呢?

其實好想有好消息分享，無奈到而家想放胎都未得住。真係好唔開心，感覺好洩氣!!! 由今年6月返仁安睇董醫生，一直都未能放胎。唔係身體排左卵，就係發現有水嚢。好啦，兩樣都無，就輪到子宮內膜都唔夠厚!!! 上個月返去照到得7mm，董醫生開多Ｄ藥俾我食同塞，自己亦狂食花膠，１日飲２包全脂奶，到最後都係8點幾，唔得。吸取上個月教訓，今個月又係勁食花膠同飲奶，董醫生亦有加藥，點知前日照左都係得8mm多，又係未得住。董醫生再開多Ｄ藥俾我食同塞，今日返去照下睇下去唔去到10。其實大家心中有數，知道都係無乜可能，但都想盡力一試。當然，今日照到都係８點幾。

星期一照完發現唔夠厚，董醫生建議我可以做個內窺鏡 check 下子宮係咪有Ｄ黏膜。做呢個手術要半身麻醉。老實講，一聽到我就唔想做，想逃避。我覺得好驚，同時又覺得好傷心，點解我要甘多問題，點解我特別難?!!上次放胎前做左全麻割息肉，今次又要 check 內膜?!!愈諗愈驚同唔開心，結果呢幾晚都失眠，半夜醒左好難訓返。

星期一知道呢個壞消息，再加上同屋企人有Ｄargue，我既情緒一觸即發。我爆啦!!! 我從來好少用甘惡劣既態度對屋企人，當然佢地唔知我有甘大既壓力。發完脾氣，心情更差。最終係尋日朝早，當我向主禱告時，我崩潰啦，我不停甘喊喊喊，我問主點解要我面對甘多挑戰，而呢Ｄ挑戰又令我甘無助，唔知點去解決。並唔係我努力就可以做到，並唔係我肯去受苦就可以有 BB。呢個漫長既等待，一次又一次，每個月面對既無奈同傷心，我頂唔順啦。我覺得自己就來痴線。我問自己每日起身既動力係咩? 每日生活又為乜?? 為左生B 我真係好多野都唔敢做，本來今個月底生日，朋友想約出來食晚飯我都唔敢太密，怕夜訓，怕太攰會影響內膜厚度。每次唔夠厚，又會猛諗自己有無邊方面做得唔夠好。我真係就來癲啦!!!!

今日我都同董醫生講，我唔想做個內窺鏡住。我覺得自己未 ready 去做住。我呢種痛苦既心情，相信只有同道中人至會明。身邊朋友成日話放鬆d，放鬆d，我聽到厭啦! 針唔吉到肉當然係唔知痛，佢地甘易話生就生當然講得輕鬆啦。我真係好憎聽到呢Ｄ說話。我同左個 friend 講，乜都唔諗啦，叫佢以後都唔好提。我唔想成為８既對象，我亦唔想係異類，俾人討論既對象。真係好厭好厭!!!!