傷痛過後再振作

呢兩日完全放自己假，出外行街，飲凍 OT (不過走冰)，停曬花膠唔飲奶，食想食既野，俾自己好好休息一下。

雖然係甘講，但真係用左兩三日既時間來調節心情。今個 cycle 放唔到胎的確好失望，大大話話等放雪胎都好似等左４個月。中間加藥又有，自己狂飲奶食花膠又有。真係食到滯，食到我想嘔!!! 我發現原來迫都迫唔來，突然之間飲太多全脂奶同食花膠，攪到個人好＂膩＂之餘，腸胃唔吸受仲攪到輕瀉 >_<　呢排呢個 down 既情緒亦由同屋企人有磨擦而一觸即爆。前兩日真係好灰，覺得好似已經盡曬力，chur 爆左個人。唔知可以再做Ｄ乜，亦唔知下一步應該點行。

尋晚又因為鼻敏感發作而失眠，已經係今個禮拜第３晚啦。訓到凌晨２，３點就自動醒，之後好難訓返，個鼻又不停流鼻水同打哈次。尋晚坐係廳度用手機上網，check 下關於鼻敏感既資料，其中提到壓力令抵抗力弱，再引發鼻敏感發作，我覺得自己正係呢個 case。心情低落，更加覺得自己身體差。有甘既心態，身體亦自然唔會好得去邊，兩者相互影響。

今朝又發蝦子餅脾氣，同佢講唔好再叫我點樣做好Ｄ啦，亦唔好再提生仔呢件事，我唔想再努力啦，我好攰，想乜都唔做呀。佢無啦啦受我氣真係慘，我亦覺得好內疚亂向佢發脾氣，但當中都有自己既心聲，因為真係唔知應該再點去做先可以去到成功既彼岸。

今日個人抖返足，又再重新得力。自問係咪無任何地方可以改進，又唔係既。。。成日話要早Ｄ訓，但好多時都係磨到成１１點幾先訓，又唔係即刻訓著。呢樣都要努力 discipline d 先得。今日 list out 要做既事，同自己講，做任個療程都係從自己既身體出發，所以一定要係心理同生理上做好個基礎。同董醫生傾過鼻敏感噴完鼻成日流返Ｄ藥水出來既問題，董醫生同意唔使再噴鼻。今次開既藥亦少過之前好多，亦無塞藥。可能董醫生都唔 expect 來緊可以放胎，佢都係想我做左個內窺鏡先。但點都好，幾大就幾大，搏埋今個月先。盡力做到最好，其他既交俾主。最重要既係心理上亦要調節，唔好再迫得自己甘緊，要開心，放鬆。既然放唔放到雪胎都唔係我話事，甘不如唔好理甘多，應做既就做，亦要預留時間做一Ｄ令自己開心既事。

振作，繼續衝衝衝!!!!!!!!!!!!!!!!!!!!!