日子，有白過嗎?

過多幾日，由 33 變 34 歲了。回想 26 歲剛結婚時，好 green，對做人老婆呢個角色好迷茫，覺得少左一個人想點就點個份自由自在，但又對展開二人生活充滿期待。個時以為生仔好簡單，想生就生到，什至初初好抗拒，怕生左BB 更加無自由。年輕時心高氣傲，覺得應該係工作方面拼搏，想做女強人。

結婚前我修讀緊一個 master degree，當時好沾沾自喜，因為我係班中最細個個。個時以為自己好叻，大把世界，讀完書出來一定要闖一番。但為左攪結婚，停左一個 semester。老公明顯感受到我個份野心，佢係一個好傳統既男人，覺得搵錢既事應該由佢來，唔想我因為野心而忽略左屋企，佢好擔心我將來為左向上抓會連仔都唔生。於是好制止我繼續讀。為左呢件事我地嘈左一場大交，最後我妥協左，放棄左。以前我係呢件事上面有怨佢，但隨住大家面對好多既挑戰，係求子路上一路走來，佢一直係我身邊為我分憂，一齊緊張一齊流淚，我無再怪佢當年甘樣迫我放棄。回想返成件事，只覺得大家當時都係好幼嫰。

正如以前曾提過，係養和放第５次胎都唔成功，我連份工都 quit 埋，諗住一心一意做好呢件事。有時都唔知係咪天意弄人，定係主自有佢既安排呢? 我對上呢份工係我畢業至今做過最開心既一份。我仲好記得 in 第３次個時我同自己講，如果呢份工請我，我一定會盡力做到最好。結果如願以嘗，順利入左呢間公司，而我亦投入好多心力，努力去做。得到既回報係升職加人工同老細既賞識。原以為會一路打住呢份工，點知最終都係要走。後悔嗎? 呢個問題我問過自己好多次，有時都有猶豫，但如果俾我簡多次，我都會做相同既決定。

本來今年１月做左流產手術之後，去完一個長旅行後我係諗住搵工，放低生仔大計。但，自己的確真係好想好想有自己既子女，而且年紀又係有限制，唔諗唔諗又係諗返呢件事。我同一個好朋友傾，我問佢我應該搵工定係繼續係生 B 呢件事上努力。佢話，如果我恨既，而家唔開始去做，第日見到人地d bbs 真係會仲恨喎。諗落好有道理，於是又再上路。

以為有之前成功既經驗，今次應該會順利。點知剩係等放胎等到而家都成4個幾月!! 雖然我都明白唔係話放左胎就一定有，但起碼有個機會先。我都知自己係好心急，係呢個心理因素令自己發癲，見住身邊朋友生完一個又一個，自己又就來大一歲啦，每次不論家庭定係朋友聚會，都係得我同老公兩個形單隻影。唉，有時真係好心酸呀!!!!

沒有工作，仔又無得生住，有時訓醒我都會問自己每日生活為左乜??? 其實我唔係太 enjoy full time housewife 既生活，我覺得有份工令我有自信，同人有 topic 傾，工作除左帶來錢，仲有滿足感。但我又恨自己好易緊張，同一做野就會好投入。如果又返工又做 IVF，好難兼顧好。

呢兩日既情緒真係谷到爆。希望主可以帶領我走出呢個幽谷。